Magia Mostra X: prezio merkeak magia ikusteko

X. urteurrena eta X. aldiz antolatzen dugula magia mostra. Ez dakigu azkena izango den edo gehiago egongo diren. Orain dagokiguna da X. honetaz gozatzea. Oso kartel interesgarria egin dugu, mundu mailako irabazleekin. Ahoa zabalik geratzeko momentuak biziko dira Espaloiko oholtza gainean.

Eta eskertu gura izan dugu urtetan magia ikusle bihurtu den ikus-entzulea. Beraz, bi egunetako sarrera 20 euroan jarri dugu. Aukera bikaina, e? Ba bai, ostiraleko magia emanaldia berezia izango da Woody Aragonekin. Eta zapatuan ohiko gara. Sarrerak laster jarriko ditugu on-line zein Elgetako Espaloia kafe antzokian. Bonoa erostea gomendatzen dizugu prezioa ere horrelakoxea du-eta.

Gozatu!  hauxe kartela!

`Malaje´antzezlana apirilaren 11n

Espaloia Kafe Antzokia zabaldu genuenean egin zen antzezlan hau. Taulagain horren estrenua egin zuten eta orain berriz etorriko dira obra berarekin. Malaje lanean ikusiko ditugu dantza, antzezpena, musika… Oso obra berezia eta polita 10 urteak ospatzen dihardugun honetan.

Zer da malaje?

Zirko kontenporaneoa eta flamenkoa. Biak batera? bai, biak batera. Konpasa izango da biak batzen dituen gakoa. Fusio espektakularra da eta flamenkoa, gitarra eta dantza lotzen dira malabarrekin, akrobaziarekin eta clownarekin. Sei artista eszena gainean eszenografia elegante batekin.

  • Non: Elgetako Espaloia Kafe antzokia
  • Noiz: apirilaren 11n.
  • Ordua: 22:30ak
  • Sarrerak: 12 euro bertan. 10 euro aurrez. Bazkideek 8. Sarrerak salgai daude on-line ere.

 

Golden Apple Quartet apirilaren 5ean

  • ikuskizuna:  ’Erase una vez… Los Golden’ - Golden Apple Quartet
  • eguna: apirilak 5
  • ordua: 22:30ean
  • lekua: Elgetako Espaloia kafe antzokia
  • prezioak: 15 euro, bazkideendako 10 euro. Sarrerak badira on line.
25 urte daraman “kolektiboa” da Golden Apple Quartet-ena. Espektakulu musikalak egiten urte guzti horiek eta helburu bakarrarekin, ikus-entzuleak ondo pasa dezan saiatzea. Donostiazko Jazzaldian hasi ziren 1990ean eta orain urteurrena ospatzera datoz Elgetara.

Musika eta umorea lotzen dituzunean ez zarela talde honekin gogoratzen? Baiezkoan gaude. a Capella kantatzeko modu hori…

Baliteke telebistatik ezagutu izana askok eta askok, hainbat plato pasatu baitituzte laukote moduan. Hala ere, antzeztokia da Golden Apple Quartet-ek berezko duen esparrua. Jokurako karta guzti-guztiak erakutsiko dizkigu laukote honen apirileko gauez.

Espektakuluaren laburpen bat bideo honetan ikus dezakezu.

HERRIXA DANTZAN zuzenean Xut taldearekin apirilaren 6an

Iruñeako Xut talde historiko / berriak dantzarako musika ederra egiten du. Herrixa Dantzan saioetan sarri erabili izan ditugu Xut-en doinuak, grabatuta. Oraingoan, zuzenean izango ditugu geurean. Agarrauan, soltean, jauziak, kontradantzak, bolant dantza, Baztango zortzikoa… Aparteko aukera izango da, zuzeneko emanaldi gutxi egin baitute azken urteotan.
  • NOIZ: apirilak 6, domeka.
  • ORDUA: 19.00
  • NON: Espaloia Kafe Antzokia
  • Sarrera doan (txapela pasako dugu)
  • Parte hartzea libre
  • Laguntzailea: Elgetako Udala
Xut-en diskografia:
  • Fanfarre Xut (1979): Festa eta dantzarako musika eginez arrakasta handia izan zuen Xut fanfareak urte haietan. Diska / kasete hura herrietako jaietako ohiko soinu banda izan zen.
  • Zahar Berri (1988): Migel Angel Sagasetak bildu eta argitaratu gabeko partiturak musikatu zituen Xut-ek (martxak, polkak, kontraiantzak…)
  • Gara 2012 (2012): Dantza eta festako ohiko erritmoetan oinarritutako doinu berriak konposatu ditu Roberto Lazarok (jatorrizko Xut fanfarretik geratu den kide bakarrak), eta musikari talde berria bildu du grabatzeko. Baltsa, polka, habanera, euskal korridoa, fandangoa, Baztango zortziko eta Bolant iantza doinu berriak… dantzarako hamazazpi pieza eder biltzen ditu Xut-en azken lanak.
Xut-en musika guztia Interneten dago entzungai eta eskuragai (Spotify, iTunes, eta abar).
Bideoak:

Yllanak 20 urte eta Espaloiak 10: Muuu2! lanarekin ospatuko dugu

Guk 10 urte egin behar ditugun moduan egingo ditu 20 Yllana taldeak. Muuu ere esan barik egin dituzte Yllanakoek! bada meritua!

1991an hasi ziren hainbat gazte amets egiten. Muuu izan zen lehenengo-lehenengo espektakulua. Eta orain, Muuuu2 lanarekin etorriko dira Espaloira. Tauromakiaren satira bat da lan hau, matxismoa, balentria, patria, Espainiako jaia… horiek denak landuko dira modu satirikoan.

XX. mendean ere, zirko erromatarrean letxe ikusten dira zezen plazetan gizona (nola ez…) eta animalia elkarri desafioa eginda. 20 urte ondoren gaia berriz ere eszenan dago. Katalunian zezenketan galerazita, politikokeria ere tartean sartuta, Euskal Herrian ere zenbait mugimendu…

Horrekin guztiarekin egingo dute umorea Yllanakoek. Oso ohituak gauzkaten modu horretan. Badakizue ondo Espaloian antzerkia ikustera ohituratuak zaudetenok seguru-segurua dela Yllana ikustera joatea. Ez dute oraingoan ere hutsik egingo. Oleeeeeee!

Yllanakoak badatoz: komediaren kontzientziaz jantzita, erritmoarekin, soinua beste pertsonaia bat bailitzan landuz, estilo zuzenean eta jarrera ganborroarekin. Zer gehiago behar duzu? etorri eta gozatu!
Hau da Espaloiak azken txanpa honetan egiten duen beste keiñuetako bat. Oso harreman sendoa izan dugu Yllana konpainia eta Madrileko Alfil antzokiarekin. Hasierara bueltatzea ziurkulua isteko modu egokia  dela iruditu zaigu eta elkarrekin ospatuko ditugu Yllanaren 20 urtean eta Espaloiaren 10ak.

Zea Mays eta Anai Arrebak kontzertuan. Sarrerak salgai

Espaloian eman zuten kontzertua gogoan dugu oraindik. Jendea pozik ateratzen den kontzertu horietakoa izan zen. Eta orain berriz datoz bueltan Zuzen-zuzenean programaren barruan Zea Mayseko lagunak. Sarrerak aretoan bertan edo on line erosi ditzakezu.

  • Ostirala, 2014eko Apirilaren 04a
  • Ordua: 22:30
  • Aretoa: Espaloia Kafe Antzokia (Elgeta-Gipuzkoa)
  • Sarreraren prezioa: 10 € Txarteldegian / 8 € Aurresalmentam (on line ere bai)
  • Kontzertua: Anai Arrebak eta Zea Mays

Zea Mays Fermin Etxegoienen begietatik:

Balta arrakastaren ostean ere… apaltasuna inoiz galtzen ez duen rock talde sendoa.
Bakarrik, ondoezik, gaindituta sentitzen zarenean… harrotasunez altxatzeko abesten dizun ahotsa.
Eta DA diskoan aurkituko duzu Zea Mays-ek inoiz grabatu duen kantu sortarik eraginkorrena.
Beste DA batek eraman du aurrera diskoaren sonoritatea: DAVE M,  ALLEN ekoizle ingelesak.
Aurrez THE CURE, DEPECHE MODE edo CHAMELEONS bezalakoen diskoak produzitu dituen ekoizle ospetsua.
Modu ezin eraginkorragoan hasten da DA: Gaur, Bi Bihotz-Bi Ero, Oihu, Hurbil… Edozein izan liteke single. Ohi bezala, kantu zuzen eta sarkorrak dira, eta gainera sonoritate berriztuaz datoz.
DA desberdina delako, betiko Zea Mays entzuten ari bagan ere,
Ondoren, 13 zenbakiraino doa diskoa: Zea Mays bere osoan, bere sakonean.
Herrialde bat bezalakoa DA diskoa. Sartu eta geditzeko modukoa; agian, baita bizitzekoa ere…
13 kantu, Zea Mays herrialdea. Aioraren ahotsak hegan egiten du, Pitiren gitar gainean igota.
Lurrean tinko dira Asierren bateria eta Rubenen baxua.
Rock talde sendo bat, kantari bikain batekin… eta inoizko kanturik eraginkorrenak,
gainera sononitate berrituaz. Arrakastaren ostean, Zea Mays bere onenean DA.

Anai Arrebak Iker Barandiaranen eskutik:

Gizartea galbidean dago. Krisiak jota, diru-sarrera eta ilusio gabe, ordaindu ezin ditugun etxeetan lurperatuta, Internet entretenimendu eta lagun bakar gisa, konektatuta gaudela uste dugu, baina ez gara kalera, garitoetara irteten eta, isolatuta, ez ditugu emozioak azaleratzen. Era berean, metala, rocka, elektronika, punka… dekadentzian daude, ilusio faltan, ez da gauza berririk irteten eta musikari zein musika zaleak noraezean dabiltza.

Hala, rocka, metala eta beste estilo batzuk muturreraino lantzen aspertuta, Pasaia San Juango hainbat musikarik logia endogamiko bat osatu eta beraien oinarria ezkutatu ezinik -gitarreroa eta indartsua- musika dantzagarria egiteari ekin diote. laz autoekoiztutako maketa confetti eta guzti- ospakizun bat izan zen, haize freskoa ekarri zion Euskal Herriko musika eszenari. Eta ondoren egin izan dituzten kontzertu ugariek balio izan dute mozkor, abstemio, politoxikomano, punky, popero, metalero zein modernoak dantzan jarri eta, aspaldiko partez, barrenak askatzeko.

Jousilouli, NaizRoxa, Trigger Travis eta bestelako taldeetan ibilitako boskoteak disco musika errebindikatu, zuribeltzezko garai hauei kolorea eman, ezintasuna arrakasta bihurtu daitekeela sinistu eta berezkoa duten indarra dantzara bideratzen dute. Lan honetan post-punk, elektronika, soul, rock, funk, pop eta latinoa aurkituko dituzu besteak beste, baita sintetizadore eta makinitak ere. la guztiak balio du abestiek energia, melodia borobilak eta erritmoa erdiesteko. Hala, pistarako hit! hauekin, entzulea burua galduta dantzara eramaten dute.

Hala ere, dantzalekuak ertz asko ditu, gauean mozorro guztiak ez dira berdinak eta ez ahaztu oraingoan Txanogorritxok aide atseginagoa erakusten badu ere, orain arte egindako zuzenekoetan otso bat baino gehiago jan duela.

Dantza ala hil! Familia ala hil! Dantzatu hil arte!!

Kontzertu honen babeslea:

 

Mursego eta Napoka iria Espaloian, domekan

NapokaMursegoElgetaMursego eta Napoka iria izango ditugu Espaloian. Domeka arratsalderako plan hoberik bai, edo? Sarrerak merke-merke daude eta dagoeneko salgai, kultura live-en, zein Espaloia antzokian bertan.

  • Eguna: martxoak 2, domeka.
  • Ordua: 19:00ak.
  • Lekua: Espaloia Kafe Antzokia
  • Sarrerak: 8 euro egunean bertan, 6 euro aurrez.

 

 

Mursego

Iban Zalduak idatzitako testua:

Behin batean Maddi, gure bederatzi urteko alaba, Mursegoren kontzertu batera eraman nuen. Han geratu zen. Eta, zortzi hilabete igaro diren arren, ez da oraindik itzuli.

Mikroipuin bat izan zitekeen goiko hori, Mursegoren musikak eragiten duen bahitura-sentsazioa islatzeko egokia, agian. Sinetsita bainago Mursegoren pop-ak harrapatzen duen horietakoa dela: Hiru diskoa, lehenengo kantatik hamaikagarreneraino, horren lekuko da. Eta pop-a diot, hitzaren zentzu zabal eta nobleenean: rocketik, abangoardiatik, klasikotik eta (geografia ezberdinetako) folketik edaten duen pop-a da Mursegorena; hau da, egungo musika herrikoia alegia, hemengoa, “hemen” leku guztiak direlako jada. Pop bat non hizkuntzak nahasten baitira, euskara atzerrikoa, gaztelania erbeste galaktiko batekoa eta portugesa edo suomiera (kasik) etxeko bihurtuz. Hiru entzuten bururatu zait, bestalde, euskal musikan inoiz benetako tropikalismorik existitu bada, orain eta hemen dela (“Euskadi Tropikal” haren haizeak iparraldetik etorri zirela iruditu zait niri beti…).

Badago beste kontu bat, azkenik, azpimarragarria, eta aurreko diskokoekin konpartitzen dutena Hiru honetako kanta gehienek: istorio bat dutela bere baitan, ipuin bat ia; filmezale batek, ordea, diskoko kanta askoren izaera zinematikoa nabarmenduko luke, ziurrenik. Pelikulak eta ipuinak gustatzen zaizkigunontzako opariak dira, edonola ere, Mursegoren diskoak. Eta hiru dauzkagu honezkero: biblioteka txiki bat.

Eta honek goiko mikroipuinaren amaierara nakar atzera. Honatx:

Promoaren testuari azkeneko puntua ipini, CD jogailua gelditu eta bertatik atera dut Mursegoren diskoa. Norbait atea jotzen ari dela ohartu naiz orduan, eta, niri «Aurrera!» esateko astirik eman gabe ere, hemezortzi edo hemeretzi urteko gazte bat sartu da gelan: «Aita! Aurkitu egin zaitut, azkenean! Non ibili zara denbora honetan guztian…?». Eta Maddik, gure alabak, gainera egin dit jauzi, ni besarkatzeko asmoz.

oh.: Informazio gehiago eta kantak hemen. (Mursego)

Napoka iria

Gorka Bereziartuak idatzitako testua:

Benetakoaren abantailak “Ez du ezer frogatu beharrik, horregatik
ateratzen da hain ondo”. Argazkilariaren estudioan tipo bizardun zimazu hura, kieto,
lasai, bare, ez irribarre urduri, ez imintzio arraro, ez pose. Bost axola aurrean
kameratzar hura edukitzea, fusilamendu pelotoi bat jarrita ere ez zuen kopeta
zimurtuko.
Bi, hiru, lau flashekin amaitu zen saioa, dena haize alde; goiz hartan ikasi nuen benetakoak
badituela zenbait abantaila estetiko. “Horrela bai gustura”, esan zuen argazkilariak.
Napoka Iria ere tipo hark zeukan jarrerarekin joan da estudiora nik uste, eta nabaritzen da.
Arnasten ikasteko berrizen beren buruari erretratua atera diote, irribarre urduririk,
imintzio arrarorik, poserik gabe.
Taldeak aurreko diskoko oinarri berdina dauka, beraiek dira dudarik gabe, argazkiak
ez du gezurrik esaten. Baina arropak edo orrazkera edo zerbait ez al dute aldatu? A, ez,
ahotsak dira, interbalo txikiagotan dabiltza melodiak; eta sakabanatuago dago lehen
kanten puntu jakinetan kontzentratzen zen tentsioa; moldaketak atmosferikoagoak dira
eta oro har, indie-folk soinurantz lerratu direla esango nuke. Gehiago adierazten dute
gutxiagorekin edo, azkenaurreko piezaren titulua probestuz, Erantziz jantzi dira.
Eta gero detaileak daude: Izotzetan erre ixten duen arramazka elektriko hori; bateriaren
erritmoa Disonantziak harago eta harago eramaten, basamortuko punteo bat lagun
duela; 1990eko hamarkadara zaramatzan Kontraren hasierako riffa; edo Erantziz
jantziko elkarrizketa, zarataren eta arpegio akustikoaren artean. Ñabardurak zainduz lan
egin dute, antzematen da. Kontzeptu aldetik ere eboluzioa dago, Etxeorratzeko asfalto-giro itotik diskoa ixten duen Distantziatikera, non Miren eta Ander “baso bihotzean ortozik” dabiltzan. Espaloitik belarretara iragan dira CDa gelditu denerako eta zu, entzuten, ez zara trantsizioaz konturatu ere egin. Ondo egin dutelako da. Benetakoaren abantailak.

oh.: Informazio gehiago eta kantak hemen. (Napoka iria)

POTOLOGUAK estreinaldia Elgetan: barrez lehertzeko obra

Elgetako Espaloian oso, oso zapore goxoa utzi zuten Bodologuak ikuskizunarekin. Irribarrea marrazten zaigu pentsatzeaz bat. Atomikoa da hirukote hau! Monologo zale bazara ez duzu aitzakiarik, pozik aterako zara aretotik eta barrez. Zer gehiago behar duzu ba?  Eta monologo zale ez bazara ere etorri, ez zara damutuko.

Potologuak

  • Eguna: otsailak 21
  • Ordua: 22:30ean
  • Sarrerak: Sarreran bertan 12, aurrez 10 euro (bazkideek 8, Espaloian bertan).
  • Sarreak on line hemen: kulturalive.com

Potologuak izena du publikoa barrez lehertzeko Txintxetak sortu duen antzezlan berriak.
Bodologoekin nahikoa ez eta oraingoan Mikel Pagadi, Egoitz Lasa eta Nagore Aranburu, Potologuak botatzeko asmoarekin elkartu dira. Euskaraz eta hain ondo funtzionatzen duen bakarrizketa formatuan dator ikuskizun berria. Umorea ardatz hartuta, gure gizarte eta harremanen analisi bat egingo dute.

Legebiltzarreko zein bileratan erabaki zen batukada euskalduna dela? Hirugarren seme/alaba aurreko bien arropa birziklatzeko enkargatzen al da? Medikuarengana azpiko erropa garbiekin ez bazara joaten zer gertatzen da? Ze premio nobelek asmatu zuen komuneko eskobilla? Zenbait opari jasotzea baino, ez al da hobe zaplasteko ba jasotzea? Taberna guztiak ixteko zergatik jartzen da Benitoren Erribera? Gizajoak ze kulpa dauka? Galdera hauei eta beste askori erantzuna bilatzen saiatuko dira Potologuak ikuskizun berrian. Gauza bakarra dago ziur hirukote honekin. Egia? Ez. Barrea.

  • Iraupena: 70 MINUTU.
  • Aktoreak: MIKEL PAGADI, EGOITZ LASA eta NAGORE
  • ARANBURU.
  • Testuaren egileak: MIKEL PAGADI, EGOITZ LASA eta
  • NAGORE ARANBURU.
  • Zuzendaria: ANARTZ ZUAZUA.

Sarreak on line hemen: kulturalive.com

 

Balerdi Balerdi eta Bide Ertzean taldeak otsailaren 7an

BideErtzBalerdi

Bi taldeek ezagutzen dute Espaloiko taula gaina eta baita taula ostekoa ere. Oraingoan poparen gorenean dauden bi taldeok batera ikusteko aukera izango dugu. Nafarrak batzuk; Gipuzkoarrak besteak.

Bide Ertzean taldeak “77″ diskoa aurkeztuko du, eta zenbait kanta egingo dituzte hango eta hemengoak. Balerdi Balerdik berdin eta kanta gehienetan PETTI ere izango du laguntzen gitarra eta ahotsekin.

Kontzertu honetan sorpresaren bat ere egongo dela aurreratu digute. Bertsioren bat batera jotzeko asmoa… Galdu egin behar ote duzu kontzertu hau?

Eguna: Otsailak 7
Ordua: 22:30ean.
Lekua: Espaloia Kafe Antzokia.
Sarrerak bertan, edo baita Internet bidez.